Dubai, UAE — Opisyal na nilagdaan ng Department of Migrant Workers (DMW), sa pangunguna ni Secretary Hans Leo J. Cacdac, at ng DataFlow Group na kinatawan ni Chief Strategy Officer Amit Gupta ang isang Memorandum of Agreement (MOA) noong Enero 9 sa Conrad Hotel, Dubai. Ang seremonyang ito ay nagsilbing pandaigdigang paglulunsad ng Online Employment Contract Verification System (OECVS) — isang ganap na digital na plataporma para sa mga overseas Filipino workers (OFWs).
Layunin ng OECVS na pahintulutan ang mga OFW na mag-submit, magbayad, at mag-download ng beripikadong kontrata online, nang hindi na kailangang pumila o magtungo pa sa opisina. Ang sistema ay may tagline na “Digital, Mabilis, Walang Pila.”
Ayon sa DMW, mahigit 30,000 kontrata na ang naproseso ng sistema mula nang ito ay subukan sa MWO-Dubai. Tinatayang nakatipid ang mga OFW ng halos AED 2 milyon at 137,500 oras ng oras ng biyahe at paghihintay, lalo na sa Dubai at Northern Emirates.
Binuo ang OECVS upang mapabilis ang proseso ng beripikasyon ng kontrata, mabawasan ang manual na hakbang, maprotektahan ang personal na datos, at mapahusay ang serbisyo publiko sa ilalim ng prinsipyo ng “Red Carpet, Not Red Tape.”
Bahagi rin ito ng mas malawak na digitalization program ng DMW, kasama ang OFW Pass at ang Kumusta Kabayan App, na nagbibigay ng iisang digital identity, real-time na tulong, at ligtas na access sa mga serbisyong pampamahalaan para sa mga OFW sa buong mundo.
Ipinahayag ni Secretary Cacdac na ang MOA ay isang mahalagang hakbang sa modernisasyon ng serbisyo publiko at sa pagtiyak na ang migrasyon ay ligtas, maayos, at may dignidad, habang patuloy na pinangangalagaan ang karapatan at kapakanan ng mga manggagawang Pilipino sa ibayong-dagat.
Ayon sa kasunduan, sisimulan ang global rollout ng OECVS sa Abu Dhabi, Hong Kong, at Saudi Arabia sa unang quarter ng 2026, kasunod ang Singapore at iba pang bahagi ng Middle East, at sa ikalawang kalahati ng 2026 ay target na rin ang Europe at iba pang bansa sa Asya.
Inaasahang makakatulong ang sistemang ito upang higit pang mapagaan ang proseso ng dokumentasyon ng mga OFW at mapabuti ang kalidad ng serbisyong ibinibigay ng pamahalaan.
