Isa sa mga mahalagang dokumento para sa Overseas Filipino Workers (OFWs) ay ang OWWA e-Card. Ito ang opisyal na patunay ng aktibong pagiging miyembro ng Overseas Workers Welfare Administration (OWWA) at ginagamit sa pag-avail ng iba’t ibang benepisyo at serbisyo ng ahensya. Para sa mga OFW at kanilang pamilya na nagtatanong kung saan maaaring kumuha ng OWWA e-Card, narito ang malinaw na gabay.
MGA LUGAR KUNG SAAN PWEDE KUMUHA NG OWWA E-CARD
1. DMW Central Office
Matatagpuan sa Blas F. Ople Building, sa EDSA corner Ortigas Avenue, Mandaluyong City, Metro Manila. Bukas ito Lunes hanggang Biyernes, 8:00 AM hanggang 5:00 PM. Maaaring pumunta rito ang mga OFW para sa OWWA e-Card at iba pang transaksyon na may kaugnayan sa kanilang membership.
2. OWWA NCR Regional Office
Ang OWWA NCR Regional Office ay nasa 139 Sen. Gil Puyat Avenue, Pasay City. Bukas din ito Lunes hanggang Biyernes, 8:00 AM hanggang 5:00 PM. Ito ay mas madaling puntahan para sa mga OFW at dependents na nasa National Capital Region.
3. OFW Lounge – NAIA Terminal 3
Para sa mga OFW na paalis o kakarating lamang ng bansa, maaaring kumuha ng OWWA e-Card sa OFW Lounge sa NAIA Terminal 3. Bukas ito Weekdays mula 6:00 AM hanggang 10:00 PM, at Weekends mula 8:00 AM hanggang 5:00 PM, kaya’t mas flexible para sa mga biyahero.
4. OWWA Central Office
Matatagpuan sa F.B. Harrison Street, Pasay City, Metro Manila, bukas Lunes hanggang Biyernes, 8:00 AM hanggang 5:00 PM. Isa ito sa pangunahing tanggapan ng OWWA na nagbibigay ng kumpletong serbisyo para sa mga miyembro.
BAKIT MAHALAGA ANG OWWA E-CARD?
Ang OWWA e-Card ay nagsisilbing lifetime membership ID ng OWWA. Kailangan lamang manatiling aktibo ang iyong membership upang patuloy na makinabang sa mga programang pang-edukasyon, pang-kabuhayan, medical assistance, legal assistance, at iba pang serbisyo ng OWWA.
PAALALA SA MGA OFW
Bago pumunta sa alinmang tanggapan, siguraduhing aktibo ang inyong OWWA membership at magdala ng mga kinakailangang dokumento tulad ng valid ID at pasaporte. Para sa updates at karagdagang impormasyon, maaaring bisitahin ang www.owwa.gov.ph o tumawag sa OWWA Hotline 1348.
