Pampanga, Hunyo 5, 2025 — Bilang pagkilala sa kanyang halos apat na dekada ng tapat na serbisyo sa ibang bansa, pinarangalan ng Department of Migrant Workers (DMW) si Gng. Aurora R. Regner, isang 74-anyos na kasambahay na nagsilbi sa Muscat, Oman mula pa noong 1985.
Si Gng. Regner ay nagtrabaho para sa isang kamag-anak ng miyembro ng royal family sa Oman sa loob ng 39 na taon. Kamakailan lamang siyang umuwi sa Pilipinas dahil sa karamdaman sa puso na nagdudulot ng madalas na paghirap sa paghinga. Ayon sa kanya, kung hindi lang dahil sa kondisyon ng kalusugan, nais pa rin niyang magpatuloy sa pagtatrabaho.
Sa kanyang pagbisita sa DMW Central Office noong Hunyo 5, mainit siyang sinalubong ni Secretary Hans Leo J. Cacdac at iba pang opisyal ng ahensya. Sa naturang pagkilala, tiniyak ni Secretary Cacdac na ang pamahalaan, alinsunod sa direktiba ni Pangulong Ferdinand R. Marcos Jr., ay patuloy na magbibigay suporta sa mga nagbabalik na OFW, lalo na sa mga senior citizens.
“Ang dedikasyon ni Ms. Regner ay tunay na kahanga-hanga. Ang kagaya niya ay hindi lang dapat pahalagahan, kundi dapat paglingkuran din,” ani Secretary Cacdac.
Nakatalaga si Gng. Regner na tumanggap ng libreng medikal na serbisyo sa OFW Hospital sa Pampanga sa darating na Lunes. Sasailalim siya sa mga kinakailangang pagsusuri at sagot ng gobyerno ang transportasyon patungo’t pabalik sa ospital.
Noong 1996, si Gng. Regner ay na-diagnose na may tuberculosis at muntik nang ma-deport, ngunit sinuportahan siya ng kanyang amo sa pamamagitan ng pagbabayad ng kanyang pagpapagamot sa Royal Hospital, pati na rin ang kanyang pagkain at tirahan hanggang sa siya’y tuluyang gumaling.
Kahit nakaranas ng pressure na magpalit ng relihiyon, matatag siyang nanatili sa kanyang Kristiyanong pananampalataya. Dahil sa kanyang katapatan at mabuting halimbawa, isa sa kanyang mga amo ang tumulong sa limang pamangkin ni Gng. Regner upang makapasok sa trabaho sa Oman.
Tinawag ni Gng. Regner ang pagkilalang ito bilang isang “once-in-a-lifetime experience”, at isinulat ito bilang mahalagang alaala sa kanyang personal na diary.
Ang kanyang kuwento ay patunay sa dakilang sakripisyo at hindi matatawarang serbisyo ng mga Overseas Filipino Workers (OFWs), na tunay na bayani ng ating panahon.
