Isang padre de pamilya mula Isabela ang dumulog sa programang Wanted sa Radyo upang ireklamo ang kanyang OFW na misis dahil sa umano’y pakikipagrelasyon sa lalaking nakilala nito sa TikTok.
Ayon kay Arnulfo Cuenco, 18 taon na silang kasal ng kanyang asawang si Marivic at mayroon silang tatlong anak. Ang pagkakaalam niya ay nagtatrabaho pa rin ito sa Kuwait, ngunit natuklasan niyang nakauwi na pala sa Pilipinas noong nakaraang buwan.
Sa halip na umuwi sa kanilang pamilya, sinabi ni Arnulfo na nagtungo umano ang kanyang asawa sa Davao upang makipagkita kay Darell Ken Pumatlag, ang sinasabing karelasyon nito. Nakakita rin umano siya ng larawang magkasama ang dalawa na ipinost sa social media.
Kuwento ni Arnulfo, sa TikTok lamang umano nagkakilala ang kanyang asawa at ang lalaki. Inakusahan din niya ang misis na nagpapadala rito ng pera at bumibili ng iba’t ibang kagamitan.
Aniya, umaabot umano sa P14,000 ang perang ibinibigay ng kanyang asawa sa sinasabing kalaguyo. Binilhan din umano nito ang lalaki ng motorsiklo at telebisyon, habang nananatiling sira-sira ang kanilang bahay.
Sinabi pa ni Arnulfo na nagkaroon umano ng utang na P5,000 ang kanyang asawa, ngunit tumanggi siyang bayaran ito. Hindi rin niya alam kung nasaan ngayon si Marivic.
Sa kabila ng nangyari, sinabi ni Arnulfo na handa pa rin niyang tanggapin ang asawa kung babalik ito sa kanilang mga anak.
Nagbigay rin siya ng mensahe sa sinasabing karelasyon ng kanyang misis, na ayon sa kanya ay pera lamang ang habol dito.
Wala pang inilalabas na pahayag ang asawa ni Arnulfo at ang lalaking iniuugnay rito hinggil sa mga paratang. Ang lahat ng alegasyon ay batay sa salaysay ni Arnulfo at hindi pa napatutunayan sa hukuman.
Full Video
